10年前的10月, 雖然唔記得廿幾號了, 但依日就係在朋友的公司BBQ聚會時第一次認識黃生, 不經不覺, 話咁快就過左10年, 一齊經歷過好多開心的事, 唔開心就真係唔多記得, 依個就係我o既優點吧, 黃生係個好肯就老婆的人, 就算有時argue, 佢都唔喜歡同我嘈落去, 依d都係我地咁多年少爭吵的原因, 大家都學識好多相處之道, 依方面本來就係一種好深的學問, 有幸做了夫妻, 有幸一起過了十年, 希望有幸能一起共渡往後的日子.
今年咁特別的日子, 送了隻Forza 特別版比黃生做禮物...
拋磚引玉係要付出少少o既, 我想買咩, 下次話你(黃生)知呀...
其實黃生平時都時常幫我找數架喇.
CALICO CRITTERS 全新網站終於出現, 色彩繽紛的頁面真係變得好吸引! 重有好多看到令人驚喜的地方.
click向道路會經過好多間美麗的房屋/酒店,
入到屋內可以看到好多森林家族成員.
某些成員重有有趣的動畫欣賞, 十分有心思!
所有video亦可上youtube欣賞!
阿叔生日請食飯, 兩圍親友到賀, 個個見到依對老虎仔就抱過唔停, 又真係好盞鬼o既, 佢地真係任抱唔嬲架, 成晚都無喊過, 依家得4個月已經幾大力下, 果然有老虎o既氣力.
我當然唔執輸, 抱住對孖仔合照喇!
燈光影到對孖好似一黑一白...
twins的家姐一樣好cute好精靈, 重識錫我依個大姨媽tim, 叻女!!
上星期六中秋正日, 黃生舊同事兼好友終於拉埋天窗, o係黃金海岸的露天花園攪簽名儀式, 第一次去依類wedding party, 露天花園係感覺清新特別d, 不過天氣重未回涼就比較辛苦, 個個著得靚靚去觀禮但又汗流浹背, 希望第時有朋友結婚尤其係室外party, 最好都係冬天攪, 不過依家o既冬天都唔多凍, 記得上年santa同前年chinese new year我重係著短袖衫咋...
anyway, 祝福一對新人依世都一齊甜甜蜜蜜, 為為食食...hehe
依對新人不嬲愛整野食, 今次佢地突破傳統, 唔派西餅卡, 改派handmade 冰皮月餅, 果然好有心思, 味道都唔錯架.
上星期全公司放假, 黃生陪我請埋假, 一連四日假期雖然無得去旅行, 但都過得好充實.
1/10 國慶日天公做美, 晨早未夠9點起身睇直播慶祝國慶60週年, 睇完我國 show off 軍事器械, 聽完胡總大喊: 同志們辛苦喇.... 下午就o係家中睇下碟, 咁啱依兩日涼返D, 夜晚即慶兩條友就去BBQ, 行去屋企附近的有叉用燒烤場, 原本都諗住唔會點多人架喇, 第日d人重要返工麻, 重有好多人去睇煙花呢, 去到真係小到得小貓4-5枱, 燒得更舒服!!
太耐無燒我至愛的雞翼同廚師腸喇, 都係天氣太熱, 遲遲都未轉涼, 依晚終於滿足晒!!
早兩晚的迎月夜, 好大好光的月亮, 不過唔夠圓.
燒完雞翼, 行返屋企附近的7仔, 買杯十幾年無飲過的思樂冰, 太耐無飲, 我同黃生用飲管都飲唔到, 要用管下的(筆)位(筆)上黎食, 唔記得以前係咪都係開頭飲唔到架呢... anyway, 燒完野食飲, 真係爽呀!!
