一家四口的生活, 森林家族的世界.: 6月 2011

2011年6月30日星期四

鬆弛熊專門店@南豐店

有唔少人去搵荃灣的鬆弛熊專門店都未必搵到, 順便post個地址比fans們.

荃灣南豐中心1樓A120E室 (o係其中一個入口內右面的行仔內)

website: www.kumastore.com.hk/kuma

明師傅甜品

Happy thursday, 去左荃灣行街shopping, 行完買完去左明師傅食甜品, 沿途經過唔少食店都堆滿人, 真係越夜越精彩!

上次黎已經係冬天的事, 一樣order左個法式焦糖燉蛋, 唯一唔同係今次食凍的, 蛋依然又香濃又滑, 一樣咁好食!

無記錯好似叫涼爽, 雪糕加上什果西米露, 重有杯椰皇汁另上, 食完果然涼晒.

2011年6月28日星期二

無冷氣巴

昨晚轉車, 上車都未發覺, 行到車箱中間先發現o係無冷氣巴士, 真係好耐無坐過, 依種車o係香港越黎越少, 如果壞一架就無一架, 坐返有d懷念的感覺, 例如以前會比d風吹到頭髮亂晒, 突然落雨時就個個沖去關窗, 天氣熱時會熱到隻狗咁, 所以又名"熱狗", 真係好多回憶.

smiley face @ 周柏豪

上星期一出碟就走去買周柏豪隻新碟, 為左一首Smiley face, 真係好好聽, 其他歌亦唔錯, 但係隻碟setting好細聲, 開機要多幾度先夠.

2011年6月27日星期一

hugo愛拉尺

用拉尺拉出時發出的da da da聲, hugo同haven一聽到就會好興奮咁撲埋黎.

咁鍾意就送比你

睇佢重收埋個拉尺頭

2011年6月26日星期日

吉野家鐵板燒, 宜家餐廳

早排放工去左吉野家試食鐵板燒, 有肥牛包腸, 豚肉片, 蟹柳, 生蛋同雜菜, 都唔錯.

另外order份肥牛鐵板燒用, 重有牛肉飯同雜錦關東煮, 夠晒豐富好味!

沙田宜家 - 食左一半先影相, 有兩份雞翼, 每份有4隻, 好正, 夠香口又有點辣, meat ball唔洗多講都係咁好食, 有份牛柳, 但真麻麻, 太靭, 甜品tiramisu雖然比食開的多cream, 但反而好啱我口味.

早兩次去IKEA時已經想食依份雞翼, 但可能假日關係, 真係人多到唔洗等.

今次一放工就去先, 吉位唔多, 坐底後已經開始要等位, 好在早到一步咋, 依家黎想有位食真係好難.

2011年6月25日星期六

心中陰雲密佈

星期六上午收到壞消息, 坐巴士出去之際遇上交通意外, 好在車上無人受傷, 轉車時又竟然遇上壞車, 無諗過會遇上禍不單行的一天, 因為親人在當日亦過世了.

一個星期, 只係一個星期一個年青人因突發淋巴癌引發血癌而奪去佢o既生命, 而依個就係黃生的表弟, 其實到依刻我都係接受唔到佢突然的離去, 其中原因係佢同我同年紀, 明白佢有好多事都未去做... 好多傷心的情緒我都唔想多表達, 唔好的結果已成事實, 唯一只可以祝福佢一路好走!

2011年6月24日星期五

韓劇都有森林家族

追緊套新韓劇, 竟然比我發現有森林家族棕耳兔爸爸同弟弟(黃格及圈內), 真係估唔到原來韓國都有SF, 重要係好紅的尹恩惠的.

睇睇下重有Chocolate mother & sister 架!!

2011年6月22日星期三

聽電台DJ講過依段片, 我覺得個問題已經唔o係對同志父母身上, 而係人們眼見不公平不合理的事情時的應有態度. 片中有令我非常感動的地方, 而研究顯示, 城市人比鄉村人真係特別冷漠, 依個係進步社會的問題, 等於以前住屋村時會同隔離鄰舍打招呼, 聯繫會比較多, 依家我只係住居屋, 一返屋企就關門喇, 重邊有機會, 不過我算好, 有個好有禮貌的鄰家女孩見親人都主動大聲叫"早晨", 唔係佢咁主動, 我地都忘記了依種簡單的禮貌.

係我地社會太進步而影響人類之間的關愛嗎?

你會主動關心身邊要幫助的人嗎?

記得有次排隊搭小巴突然落雨, 剛巧排我前面的小姐無帶傘, 我只係順口的講左句: 我遮埋你呀. 佢已經似有點感動的唔該我. 當時只係一個咁小的幫忙, 我都感到開心的.

童星寬條麵

由細到大都食開童星點心麵, 雖然見新款好耐, 但都係早一兩個月先試依款童星寬條麵, 可能寬身麵比較易食, 所以一樣喜歡. 唔搵時就周圍有, 到想搵時突然又無晒, 終於都係要去入口零食點貴買.

最平見過惠記$10.5/包, 依度分開兩個地方買, 分別要$14及$13/包.

已經食左第一包, 睇黎都擺唔耐.

2011年6月21日星期二

S8, X-Men: First Class

X-Men: First Class已經係早兩個星期睇, 有時睇完都未必記得或有動力寫個人影評, anyway, 之前3集同狼人外傳我都有睇, 只係依套前傳咩人都唔識, 真係無諗過睇, 但一個誤會就係黃生聽錯我想睇, 咁佢有日星期二見有平價票就話去睇, 我又以為佢想睇咪話好lor, 買完問返佢先知咩事...

無o既, 平平地睇都ok o既, 套戲雖然個個都唔識, 主要係講Magneto 同 Professor X由童年開始的經歷, 由朋友變敵人的故事, 但當中了解佢地的過去都係吸引之處, 而且重有一班新手異能人展示新力量都有睇頭的.

昨晚去睇Super 8, 又係見星期二平麻, 依排有d忙, 無特登去睇trailer, 其實有時我知係大片都唔想睇咁多畫面, 有時覺得睇完trailer變左睇戲時無驚喜, 點知睇睇下先發覺幾個月前睇的trailer原來就係依套戲, 哈! 黃生成日話我睇戲好抵, 睇完好快就忘記... 其實我一時時姐, 精彩畫面咪有印象d囉.

開頭十幾分鐘真係悶左d, 原來依套片係用一班兒童做主角, 搵得歷Steven做監製, 果然有少少ET外星人feel, 不過放心, 故事, 特技, 所有野都拍得好好, 一班細佬都做得好好, 重有唔少笑位, 當然亦有恐怖位, 有幕真係幾嚇人, 無嚇到我, 但我隔離個女仔嚇到彈起重叫埋出黎, 可想而知套戲拍得幾好, 起碼有人嚇到咁麻.

***記得做完等一陣重有段片睇!***

小插曲: 今次真係見到個奇人, 睇戲前, 有位上年紀的c奶同個唔知係咪女一齊入場, 佢地又要分開坐上下兩行, 個c奶一入場已經不段埋怨, 首先行入坐位時比人地把傘click到腳, 已經話人攪到佢好痛, 之後到座位見到污糟就大大聲話之前d人咁無公德心架, 攪到咁, 真係離晒舖呀, (佢係不斷大聲埋怨, 成場人都望住佢o個度, 當時我都心知不妙, 我同佢只相差一個位, 佢咁攪我地真係唔洗睇戲), 之後重鬧佢個女, 有咩好睇呀, (戲院)黑忟忟!! (我心諗入戲院唔黑, 唔通要開燈睇咩...)

好喇, 睇戲喇wor, 睇睇下又黎料, 當時我地一位之隔的空位已經比佢個女坐埋落黎, 個師奶講野的聲浪好似o係茶餐廳吹水咁大聲, 我終於忍唔住向佢個女講: 唔該 + 做一隻食指放咀外豎起的手勢. 好好彩, 個師奶無咩再嘈 lu, 唔係o既話我只好調位.

2011年6月20日星期一

迫床仔

咁細張床都要迫埋一齊瞓, 真係第一次見.

可惜睇唔到邊個之後迫上去, 一般黎講hugo唔喜歡主動痴人, 但又真係話唔埋.

haven無變, 依然係要貼住面瞓.

妹的泰國手信

上個月阿妹去左泰國旅行, 唔好彩有菌入腸入左當地醫院, 比左幾千蚊醫藥費之餘, 重驚險到last day 先發高燒入醫院吊鹽水, 好在下午退得切, 唔係佢話佢朋友都唔等佢返香港先wor, 比我唔病死都嚇死, 好在最後都claim返全數醫藥費咋, 所以去旅行真係要買保險, 唔好為左慳o個少少錢.

anyway, 講返d開心野, 依個妹平時忙到都無時間去旅行, 一去就買左咁多野比我, 成喼爆晒都係買比我咁濟(可惜多到爆左兩包薯片), 真係抵錫!!

2011年6月18日星期六

森林家族學生在公園

一個熱鬧的下午, 公園聚集了好多不同校的學生.

好學的男生們聚埋研究課題

猴子兄妹結伴放學

3個巧遇的舊同學

有時都想食雪糕, 北極熊twins尤其喜歡.

咁好玩的鞦韆當然多人等喇.

以前放學的你或依家仍然係學生的你, 放左學又會喜歡做咩呢?

我就記得以前喜歡放學後同一班同學去麥記食野, 一齊吹水.

咁多套靚校服, 你又喜歡邊套呢?

咁多套校服我比較喜歡棕耳兔妹妹的校服, 因為好似小學時的校服, 而當時亦係做學生時的happy moment, 學生之間比較和諧和真心, 可惜升上中學已經失去聯絡了, 好在中學時都有一班老死相識至今.

2011年6月17日星期五

父親節與細佬生日

細佬今年o係正父親節生日, 一次過提早返娘家飲湯食飯慶祝, 老豆又買左花蟹同賴尿蝦, 正呀!! 飯後甜品當然有蛋糕食, 可惜個魔鬼蛋糕太多cream, 老人家唔太啱食.

2011年6月15日星期三

重慶7E咖哩王

黃生左諗右諗, 生日想食咖哩, 好喇, 一心諗住去重慶食開的一間, 但去到竟然摺左, 唔係麻!!

咁啱有個promoter介紹我地去7E室的咖哩王, 見到有埋張以前阿蘇介紹過的卡片, 管理員都話OK架, 好多人食架, 咁就去試試喇.

一早6:45pm到, 唔太多人, 坐多陣就full 8成喇, 咁細單位都間到間vip房, 走時發覺唔止一個單位, 多人都唔怕等太耐.

黃生最想黎食依份燒雞塊, 佢話真係好好食, 鍾意佢用依種香料, 我就覺得雞上肶乾左d, 雞肶正d, 香料亦係我喜歡的.

免治牛肉咖哩角, 熱辣辣送到, 皮炸得香脆!!

咖哩羊肉 - 我不嬲怕羊酥味, 黃生想食都無人陪佢食, 今次就遷就佢一次喇, 老闆介紹無咁辣的咖哩, 可能有少少辣的咖哩味而唔覺有酥味, 唔錯!

有咖哩當然要酥餅, order左蒜蔥味同牛油味, 後者無咩牛油香, 前者會香d, 但蒜味唔夠.

最怕飲椰青唔夠凍, 好在無令我失望, 好冰凍, 又有果肉食, good!!

樓下promoter即派member card , 有卡就有9折.

埋單$190/, 算抵食.

2011年6月14日星期二

黃生birthday & NESCAFE Dolce Gusto 企鵝咖啡機

一年一度, 又到黃生生日, 今年禮物係黃生睇中好耐的Nescafe dolce gusto 的企鵝咖啡機, 就送比佢做生日禮物.

送咖啡杯

本身咖啡機內送幾款味的方便沖盒, 原本早排見有promote送多盒細架, 可惜今晚無, 只好自己買多盒喇.

haha, 無諗過自己同黃生會揀咁sharp的紅色, 原先都係諗住買經典黑白色或titanium的, 睇下睇下, 除左怕白色比較易污之外, 都係覺得紅色靚好多, 比返話事權黃生, 最後都係揀紅色.

紅色又真係好靚, 無揀錯.

**特登出沙田citysuper 買, 貪佢hsbc信用卡有6倍積分, 重估唔到今日係citysuper 的 1個月1次的super tuesday, o係每月第2個星期2買野都有雙倍積分優惠, 會員儲1蚊1分, 入會費$40/, 1500分有$50/, 3000分有$150/回贈, 我差少少就夠3千分, 不過積分係每季結數, 過左就無.

有禮物當然有蛋糕, 今年黃生想食ITALIAN TOMATO的士多啤梨忌廉蛋糕, 就去買左個返屋企慶祝, 剛過12點就有得食.