荃灣漢和韓燒

噚晚約左黃生舊同事去荃灣漢和韓燒, 上openrice 睇下依間有咩評語, 一睇就一額汗, 食評差到不得了, 反而另一間漢陽苑都好d呀, 傾完一輪後都係比次機會試下漢和掂唔掂先, 始終食評過左咁耐, 每人對食物的標準都唔同麻...

去到未齊人, 出去拎左d冷盤同熟食試下先, ee 又ok wor, 見到件鹵到咁深色的豬手, 真係幾正, 係唔夠甜姐.  平時依d地方d炸野一定又凍又淋, 但可能我地6點9就去到, d野炸左無耐, 我試左薯條, 春卷, 重有豆沙鍋餅, 樣樣都唔錯wor. 到冷盤小菜都ok喇, 係青瓜差d, 得個酸字.

 

依間舖o係9樓, 我地坐窗邊位, 睇到個view都唔錯. 最重要係依度比我感覺食物同環境都算幾乾淨企理, 坐得舒服, 一班friend黎一路食一路傾都唔錯, 本身依間要$118/加一, 朋友有9折discount, 即係唔洗加一, 重無限食時間, 可以慢慢食慢慢傾.

 

食物種類都真係好多, 重可以打埋邊爐,

 

有糖水, 翅, 湯... 太多野都試唔晒.

 

瀨尿蝦, 炒飯, 煎魚頭等都賣相吸引架, 不過都係無試到.

 

豬手, 炸野真係幾好食...不過晏去可能d炸野會凍d.

 

冷盤菜 and salad都好多款, 特別試食豬耳都幾爽口.

 

生果, 甜品, susi &刺身就以三文魚為主, 都好新鮮的. 

 

食到咁熱氣, 食雪糕就最啱, 不過我個胃都無位食...

 

最good都係飲品任飲! 黃生話豆漿就淡d, 但我飲五花茶都夠甜, 啱啱好喇.

 

燒呀燒, 好多野食呀!

 

我覺得依度最好食係牛仔骨, 我都食左唔少... 另外魚柳, 墨魚仔, 廚師腸都係我個人特別喜歡食.

 

真係食到好飽喇, 但都要(畢)碗好多人話正的豆腐花試下, 都幾滑架, 重可以自己試下(畢)同親自加糖同糖水, 又食又玩.

總括依間漢和都真係唔錯, 食物款多, 環境乾淨企理, 侍應都有禮款待, 下次想食韓燒都定會再黎!