肩肌炎

禮拜頭朝早瞓醒已發覺唔妥, 左邊膀頭有d痛, 直情舉唔起隻手, 拎起隻杯都會手震, 跟住試o下搽安美露, 搽完都無發熱感覺o既?? 點知到左夜晚沖涼先發出黎, 即刻鬆返d, 到第朝都係咁上下痛, 就試下冬青膏, 黃生重幫我捽左幾野, 不過無咩起色...

到第3日瞓醒重痛d咁, 頂唔順都係要去睇跌打, 住依區咁耐都無接觸過依方ML的醫師, 上網就搵到個o係內地畢業的後生專科醫師, 初頭都驚佢經驗唔夠架, 不過都試左先, 放工即刻返屋企換定件背心去睇証, 醫師幫我扭隻左手幾個動作同按幾個位, 就話我係肩肌炎, 佢幫我捽左d藥酒, 做脈衝電療, 重有敷藥, o個下我最擔心問: 咁我咪無得沖涼...   醫師話: 係呀, 抺住身先喇.   我心諗梗係無可能, 當然依d難唔到我喇, 返去搵野包住病患處, 附近就用濕毛巾抺幾次, 烏低身照洗頭, 淨沖右半身同下半身, 大熱天時當然要沖涼至舒服架喇....

再第日中午可以拆藥布, 當時都好地地, 點知到夜晚先發覺皮膚敏感, 少少紅腫, 只好搽d雙飛人頂住先, 雖然唔係話隻手即刻好晒, 起碼隻手舉得起, 係有少少痛同攰, 已經好左d, 都係要時間休養下等佢好, 戎食酸辣亦唔好舉重物.

原來我地有樣毛病, 當發覺某部位或做某動作時作痛, 會好不其然咁去重覆嘗試依個動作, 醫師話咁係唔正確架, 好似我咁, 成日嘗試舉上舉落隻手睇下重痛唔痛, 其實係會惡化發炎的程度的.