星期一晚放工出奇的熱, 熱到係感覺好奇怪, 好似企左o係個悶熱得很的桑拿房內, 行左去等巴士, 重要局多半粒鐘先上到架要去大欖轉的車, 點知竟然又比天文台玩, 行行下見到個天落大雨, 重係狗屎o個隻, 即刻打比黃生話唔去元朗喇, 諗住直接返屋企, 但黃生又話元朗無咩雨喇wor... 咁奇... 真係天有不測之風雲.
好喇, 照去, 買完阿仔d糧, 坐底街邊食美味凍豆腐花同串皇, 再去千色店巡舖, 有些少收穫, 再行左去b仔食我喜愛的雞翼尖, 黃生order腸粉同蜜瓜冰, 正!!
o係元朗一間韓國入口食店買左隻韓國出的粟米雪糕筒, 記得去韓國時同表妹買左黎試, 好味到好快就食完, 今次買完搭車返屋企途中, 同黃生一陣就食晒成包. $20/2包
上次買左隻海草綠色的Holoholo水晶球真係好靚好喜歡, 蝦仔亦好健康咁生活, 早排見到團購又有promotion賣水滴形的Holoholo Hua , 即買多兩個同黃生一人一個.
終於拎左返黎, 真係好靚, 我揀的橙色放o係公司書枱亦好襯, 黃生揀左原色, 即係天然的沙石色, 感覺好自然, 睇得特別清澈舒服.
因最初拎返屋企時發覺樹枝塌了令水變得混濁, 而且有少水問題, 昨天特別去換隻新的, 揀個更靚的樹枝境, 不過都係有少水問題, 但佢可即時加返, 之前打去代理竟然話要拎返寫字樓先加得, 心諗唔洗咁麻煩呀, 好在同門市的職員講聲話佢公司批左一換一, 佢就話無問題, 有時真係要動動腦先解決到依d原本簡單變得複雜的問題
unstable的環境, 小蝦變左透明, 我搵左好耐先搵到佢呢...
發覺依對小蝦好sweet, 成日都見到佢地停底對望.
Yesterday happy friday, 放工約左人交收, 買左set好耐都無買的食玩, 再行下街, 去花園街買燈籠佈置, 之前已經行去和民拎定飛, 行左個圈返去都要等, 計計埋埋都成粒鐘有多, 都唔明點解次次去親都咁多人?!
anyway, 終於等到入去食, 最欣賞依個蝦雞吞拿醬沙律, 雞肉係有用燒汁之類的東西調過, 中間有吞拿魚醬同蟹子, 另附上麻醬, 所有東西攪混, 有好豐富的味道同層次, 只係份量少d.
牛油帶子 - 雖然話牛油帶子, 但多油到有點過份, 食物熱度不足, 鐵板形同虛設
三文魚, 鰻魚, 金倉魚反卷 - 有點失敗, 三文魚真係唔夠鮮甜, 金倉魚直情唔覺鮮, 而且顏色深得奇怪, 只可以話鰻魚還可, 但發覺刺身都唔覺凍, 感覺放在溫室耐了才上菜, 其實都發覺其他菜都有依個問題, 大忌!!
炸雞軟骨 - 都夠香脆.
蝦天婦羅 - 蝦本身無問題, 但個脆醬真係唔得, 一d都唔脆口, 部份原因都係遲上枱, 食物唔夠熱.
進餐期間有人推銷和民信用卡, sale有95折重可以訂枱唔洗等位等等, ok喇, 見以前食都唔錯, 而且依家咁多人食, 點知食物差左, 但卡都申請埋, 都會再比多次機會佢, 但下次都係試第2間好D.
上星期同charlotte set完場景影完相就轉移去sue家繼續玩森林家族, 見到有好多屋重未入玻璃櫃, 即刻忍唔住幫手set入櫃先...
其中有依間4層未計天台的Grand Mansion, 亦係我最想買返的絕版屋呢!!!
喜歡佢空間夠大, 外look夠classic, 重有個小亭院, 可惜香港已經discontinued...
當中重有粉紅色的日版玩具店同絕版多時的花店, 玩具店都總算有uk版代替, 但花店就無lu, 拍賣都非常少見.
幫sue買的模型樹自己先前買左覺得唔錯所以介紹比佢, 大家都覺效果好好, set 場增添真實感!
好友charlotte昨日黎左我家作客, 一齊set場影相, 大部份都係佢idea, 而且用左d新模型材料, 一齊完成的感覺特別樂, 出黎的效果亦唔錯.
charlotte一家到訪海邊的浣熊家
男士們釣魚作樂
箭豬媽媽帶baby到岸邊執貝殼
(河流改色後)
浣熊家族在效外high tea
斑點狗家族bbq
兔家族在野餐
袋鼠家族享受豐富餐點
準備再出海釣魚的子民與其他子民都十分享受陽光充沛的一天
P.S. 嗚謝charlotte 到訪協助大部份set 場idea及牛奶兔提供的水紋膠片效果!
放工去左深水埗睇野, 好耐無去喇, 好多野食都好掛住! 食左幾間都曾經有電視節目介紹過的小食, 咁耐無食就試下味道如何先.
合益泰小食 叫左份腸粉, 魚蛋, 豆漿. 主角當然係腸粉, 記得幾個月前金剛小儀食到測試滑的程度-_-" , 攞黎攪! 我無研究佢有無滑到跌入喉嚨, 都係同出面食開的差不多, 其實蒸腸粉都應該係滑的吧, 只要唔太差都無咩意見, 最重要都係個醬汁, 依樣就真係我食過最好的, 我條脷唔精, 食唔出佢用咩製成, 總之與其他店的普通豉油甜醬係食得出有分別的.
公和荳品廠 食左碗豆腐花, 老實講, 唔覺特別滑, 平時第2度食反而滑過佢, 重要無糖水, 我要自己落好多糖先有味. @$7/碗
坤記糕品專家 要左白糖糕$5/, 紅豆糕$7/, 馬蹄糕$7/, 前兩樣都比黃生獨食晒, 氣有次你, 我都想試架麻!! 只係試左馬蹄糕, 無祈望的心情去試竟然有驚喜, 平時好少食依款甜品, 但今次喜歡佢夠甜, 口感夠彈又煙韌, 馬蹄又夠爽, 真係幾正!
囍囍美食 好掛住佢D椒鹽魷魚鬚, 上次食佢擺耐左的唔多好食, 今次咁啱阿姐炸起左, 剛炸起好食好多架!
周圍每樣食小小都食到飽晒, 滿足晒!!
Welcome to Baby Playground, 依個公園只招待森林家族 Baby.
先坐火車去你想玩的地方
baby penguin 有悅耳的歌聲
新建設的瑤瑤板好受歡迎!!
沙池堆滿babies
玩到餓有免費食物架
風車屋依然熱鬧
baby pig, baby cow, 睇下邊個踩得快
歡迎各位森林baby來遊玩!!
last saturday plan左出去沙田行街, 因為準備好多野要買...
quicksilver promotion 買$500/ less $200/, 係時候去入定貨, 好開心買左兩對好靚的人字拖同裙, 黃生就買左條褲同背芯.
想買喼想買首飾盒, 最終買唔到.
o係sixty eight買左d底底, 平平地又幾靚, 因為咁抵, 真係超多人揀, 因得兩格fitting room, 用左半粒鐘有多先試到內衣, 比著平時o既我已經閃走, 最終都係唔啱, 浪費時間.
想去大眾巡SF, 原來已經搬左去home square, 即係ikea o個邊商場, 點知發覺無晒玩具部, 超失望!
o係大眾對面賣竹地板家品的舖頭買左兩隻bamboo spoon, 想買好耐, 諗住要黎食粥. @15/pc
依晚ikea出奇無咩人, 行到9點半先食dinner, 但食物無咁好味, 薯條唔多脆, 香辣雞翼都無上次咁好食, 要左份小龍蝦, 出奇的咸, 只係肉丸無變依然咁好食.
買左些少東西, 今次見到款好多味的candle, 揀左 rose 同雜果, 味道好fresh, 放左o係睡房, 一入房就聞到陣清甜味.
上個星期依然o係葵涌廣場買左好多野, 有衫有首飾, 原先o係太子買左對鞋, 最終去左葵涌廣場換, 迎接秋天著就最啱, 見到好多店已經開始轉秋裝lu.
