Prince Haven

從前有位Haven 王子, 天生一副chok樣. -完-

天氣寒冷, 繼續BBQ, HOT POT

上星期六約左黃生的舊同事一齊BBQ, 一班都係元朗天水圍之友當然又揀返至正的偉記燒烤喇!
o個晚濛濛細雨, 氣溫11-12度, 天氣麻麻, 但都算唔少人, 早到搵到個有頂的靚位, 方便拎野食同近派糖水位.
是晚依然有糖水-綠豆沙, 生果, 重有即製鮮lemon 菜蜜, 咁正去邊度搵!
假日已加價到$100/ , 不過依然抵食!




今晚見天氣咁凍得8度, 又即興買材料返屋企打邊爐先!!
2條友買唔到多野, 只可揀自己至喜歡的食材, 整左個番茄薯仔湯底都幾好, 原本想買條鱔比黃生, 去到街市搵極都無, 最終見到條切好的, 但買左返去先發覺唔同o既, 味淡, 肉質亦無鱔咁爽, 其實係咩魚呢?

今晚買了$140/材料, 已算平了, 係wor, 未計預早買的肥牛tim, 計埋又剛好2百.

 

日本超毒4月新品

收到日本官網仍未公佈的小道消息, 黎緊日本4月新推一堆好毒的新品, 唔買一定毒發身痕, 小心小心!!

新出的koala family, 比英版更可愛, 亦比之前的日版學生更齊家庭成員, 但今次無弟弟, 連妹妹size都無埋, 始終欠缺了點.




豪華大宅, 樣子與lighting house好相似, 重興建埋拍車位, 實在周到!!

不嬲鐘情日本出的商店, 依間商品齊全的supermarket, 睇見都流口水!!

還有玩具店及未肯定是否糖果店, 一樣咁吸引!!

以上商品已在日本樂天預售, 如捨得比人訂可去看看此拍賣 (click here)

Little Twin Stars

兒時第一樣喜歡的卡通人物就係Little Twin Stars, 咁多年黎耐唔耐都會睇下佢的產品, 但都好少買.
今次Rement出的食玩真係覺得好靚, 上年見時都炒到好貴, 今年見到平返, 終於忍唔住敗回家.
見到成set 越睇越可愛, 重有種好奇妙的感覺, 好似搵到兒時喜歡一種東西的感覺.

鬆弛熊杯蓋

有日行沙田商務見到有個鬆弛熊杯蓋, 本身想買杯蓋好耐喇, 見到佢咁可愛, 就決定買佢返屋企喇!

不過因為佢係花型蓋邊, 隻杯大少少都蓋唔晒呢. $40/ only

謄雲架霧的回南天

今朝搭車時望過對面汀九橋都被濃霧包圍, 好似謄雲架霧的景象, 睇返自己2年前都拍過一樣情景的照片, 都是在2月發生.
今日濕度99%, 每逢依個時候都非常麻煩, 忽冷忽熱, 時濕時乾, 最麻煩都係洗衣物, 唔洗衫又唔夠著, 洗左又怕唔乾, 本身無乾衣機亦唔習慣拎出去乾洗店, 就算去都有排等, 所以家中的抽濕機都會24小時長開, 有人話抽濕機同冷氣機一樣咁食電, 但我平時晾衫都會開住佢, 始終間屋無咁濕氣重, 最重要都係保護我的森林家族子民麻.
講起子民, 我兩個大display櫃內都會長期擺出佢地的, 所以保濕措施係最重要, 本身都已經有6個迷你抽濕器, 但一到依d天氣, 始終覺得唔夠, 有機會要再買多兩個先! 

眼超超的Haven

平時都係一副可愛樣子的 Haven, 今次點解樣衰衰眼超超, 摺耳貓做飛機耳的樣子真係好攪笑!

其實Haven真係好識嗲人, 佢坐好個位, 望住上緊網的我, 原來都係想人理下佢, 幫佢R下頭.

Cafe Express buffet

星期六約左表妹一家到Cafe Express 食 buffet, 原本在新年食, 因無生蠔而改到依家先黎食, 是晚主角當然是蠔喇, 記得第一次黎係朋友介紹, 亦因此由唔喜歡變得終於識欣賞了.

先試 Scottish Rock Live Oyster, 味道鮮甜爽口, 海水味夠.

American Oyster 細細隻, 味淡, 相比較喜歡前者.

 

食到尾聲時發現轉了款 South Africa Oyster, 海水味最重, 更鮮甜爽口, 係我最喜歡的.




當然有食例牌的阿拉斯加蟹, 蝦同螺.

熱食不過不失, 反正都係試少少.




Buffet比較少試的暖芝士Raclette, 芝士味濃配上脆餅, 實在不錯, 不過要快d食, 唔係就好快乾.
以往食buffet都無試過朱古力噴泉, 當晚終於試了, 總覺得朱古力唔夠純.



差不多了, 這裡的甜品特別細件, 其實都比較環保, 可以試多幾款.

甜品不過不失, 可惜太飽試唔到杯裝甜品了.

食buffet前上了40樓的sky garden睇下維港夜境, 剛好在8點睇埋燈光匯演, 雖然當晚得12-13度, 但在角位欣賞都唔太凍.

 

buffet有多種優惠, 2人優惠係最抵, 但限額滿了, 簽卡亦有8折.
今次第2次黎食, 主角仍然是生蠔, 其他都只是大配角, $770/2位食到即開新鮮生蠔, 值得再試!

一家人熱鬧打邊爐

剛過的星期五氣溫驟降, 即約奶奶打邊爐, 好耐都無一家人在家圍埋烚下烚下, 始終揀自己喜歡的材料比出面食的好, 而且奶奶揀選的火鍋材料都特別新鮮, 多人又可以食多D款式, 是晚食得好滿足呀!!




- 牛展打邊爐真係好少見, 奶奶話凍肉舖即用機片開, 個個都特別喜歡, 不過我覺得有點腥.
- 奶奶買左好多好材料, 肥牛都90幾蚊磅, 唔好食就奇.
- 豬肉同(潤) 我都無試, 後者係唔敢食.



- 新鮮流浮山即開生蠔, 我唔食本地蠔的都覺得真係掂wor, 鮮味又唔腥, 有機會都會自己買黎再試!
- 鯇魚腩 不錯
- 但鯇魚頭更鮮更正!
- 成碟九肚魚, 我自己食晒, 因其他人都怕骨, 其實咁多款魚, 我始終對佢情有獨鍾, 真係特別鮮味滑流架!
- 另外重有鯪魚肉無影, 又係打邊爐最常食的.

是晚都買左唔少棻同菇, 有些無影, 其中第一次試的九菜花原來都唔錯, 特別爽甜.
重有打邊爐不少得的三寶, 每次都起碼買一兩款的山根,炸枝竹同響鈴.

最攪笑係食到尾聲奶奶先記得重有大隻鮮蝦, haha, 有時太多野食真係會唔記得呢.
By the way, d蝦真係又大又爽, 比我之前買的抵食好多呢.

Rilakkuma chocolate iphone case

新鮮出爐的Rilakkuma chocolate iphone case前日到港, 剛好比我見到, 見到實物都真係幾過引, 價錢$180/唔貴就帶佢返屋企喇!



開盒後, 真係好似朱古力wor, 有d想食tim.^^

加上鬆弛熊咁可愛的圖案, 點忍得住手唔買.

貓夫婦的幸福情人節

貓爸爸今年在情人節送上一藍粉紅玫瑰同禮物, 貓媽媽一見非常開心感動, 還說聲: 每天都愛你!!  So Sweet!!



原來禮物除左有朱古力, 重有扮兔攬企鵝的白熊同啡熊(鬆弛熊, RILAKKUMA), 好可愛呀!!

valentine's day celebrate in home

早幾日諗, 今年情人節食咩好呢, 其實食咩都好, 反正我都唔會食D好貴的2人大餐, 平時都少在家煮食, 就在家慶祝吧!

今晚黃生好醒, o係屋企搵到支在好耐之前買的香檳, 拎埋兩隻好少用的香檳杯, 即刻變得好有情調.
依支香檳隻味好啱我, 提子味加桃味, 味道清新, 提子味唔會過重, 越飲越回味, 下次都要買多支看門先.



想食海鮮餐, 在街市揀了幾樣野;
-買了舊好新鮮的鯇魚腩, 要有魚卜同魚旗位, 因為特別滑架! $29/
-蜆, 老闆話特價比埋我, 份量剛好, 最重要新鮮好肉. $25/碟
-我最喜歡食螺, 黃生少食, 點都買返半斤自己食 $15/
-基圍蝦, 比之前貴好多呢 原價要$68/斤, 現又特價 $45/約一斤
-買咁多海鮮都會怕唔飽, 買多條燒腩仔, 約$45/

早兩日在美心已經買定重食埋的鮮藍莓芝士蛋糕, 味道不錯, 芝士味夠濃, Tasty!!
原價$88/, 特價8折 $70/

Music and Lyrics

一套已經係我心目中變成經典的電影"Music and Lyrics", 今晚在電視重播, 見到時已經尾聲, 好在屋企有隻dvd, 即興拎返出黎睇先.
再睇比第一次更入戲更get到笑位感情位, 淨係一開幕場勁80年代經典music video已經笑到我捲埋, 另一樣咁80年代 feel 的歌曲"Meaningless Kiss" , 更係sound track內最喜歡聽的其中一首歌. 無論戲同歌都咁正!

"Music and Lyrics" trailer, 一開幕就有勁攪笑的80年代經典music video



"Meaningless Kiss" 勁80's, 勁chok到抽筋, 笑屎我. 好難先搵到可以share的video, 但質素有問題,
如想睇更好的可去 http://www.youtube.com/watch?v=Yxg3U63zaTk



"Way Back Into Love" - 特登搵到全part 戲的一幕.

硬要痴埋黎

依排凍凍地, 兩兄弟耐唔耐都會瞓o係sofa, 有日hugo瞓個位size剛剛好, 但haven竟然都可以打橫攝埋去, 果然有計.

煲劇看社會問題

最近追"缺宅男女"已到尾聲, 本身都幾喜歡依d寫實戲, 唔理佢有幾多成真幾多成假, 相信無錢買樓的香港人都一定大把, 講依家樓市幾唔正常, 政府幾無能, D樓根本貴到唔係香港人住, 結婚都無個安樂窩, 又點會有開心的生活環境. 有時睇劇從中睇到社會的問題, 都值得令人反思.
上一套"換樂無窮"就有講大公司加價, 就好似香港依家攏斷市場的情況越來越嚴重, 地產霸權, 好多食店連鎖店超市等都係地產商旗下的, 領會點迫小商戶無路生存, 大商戶做獨市生意迫人買貴貨, 我都開始正視依個問題, 唔係話我可以學人擺買依d地產商店, 但都會盡量身體力行, 幫襯多d小商戶, 依家經過一d辦館都會買多d日常用品, 要係依d舖都做唔住, 到時挨貴貨都係自己.
另外都想講最近的雙非孕婦問題, 雖然我未有生小孩的打算, 但諗諗都知有幾深幾長遠禍害, 首先香港的孕婦得唔到合理的醫療服務分配, 私院只為賺錢開天殺價, 公院的醫護有幾辛苦服務沖急証的內地孕婦, 重有依班雙非小孩日後的醫療, 免費教育,  房屋津貼等都已經覺得比人吸緊血, 如政府再唔決定採取行動, 我地又點會有好日子過呢.
香港依家問題多多, 香港人亦埋怨多左, 眼見有些人出聲行動抱不平, 但亦有人係為鬧而鬧, 咁o既社會風氣又點會和諧, 有時實在要思考清楚邊d人係忠言邊d係為挑起火頭想製造混亂.

大自然素食

難得新年時約埋媽媽同3姨2姨一齊去食齊, 一行6人去tst分店食tea , 地方細細, 但好多人排, 唔早訂真係無得試. 原來依個時段有半價, 咁抵食, 重有阿妹請, 當然要試試.

-3色排骨, 好有特色的味道, 除甜酸及沙拉味, 最記得有款用酸梅制成, 好特別!!
-雞絲粉皮, 無麻醬, 無味道.
-沙嗲肉串, 我將一串串分開了, 不錯的沙嗲味.




-個個都話必order的牛油果芝士多士, 不外如是, 唔覺有牛油果味, 芝士味亦太淡.
-什麼炒滑蛋, 係煮得好, 蛋夠滑, 配上爽口的什麼菇.
-南瓜及忌廉酥皮湯, 前者好好多, 後者忌廉不夠味.




-黃金蛋炒豆, 係香脆可口, 不過唔適合年紀大人士, 真係好高膽固醇好多油.
-餃子, 無試
-意大利茄汁雲吞, 用鮮茄煮成, 分外開胃, 有水準之作.

6個人試9碟餸, 重有好多想試的, 水準亦ok, 有機會都會再來!
食咁多野都只係3百幾, 果然下午茶抵好多!

 

珮夫人潤喉糖

 早前喉嚨不適, 成日見想咳, 所以都會買好多款潤喉糖旁身, 買過依款珮夫人潤喉糖系列不錯, 多款味, 烏龍茶味最特別, 有時萬記/屈記減價$11/2包





之前一咳, 就算西藥食得好都會重有d未清, 有晚半夜黃生問我飲唔飲水, 我先知自己咳, 原來瞓著左真係唔知發生咩事, 最慘係咳多兩聲咳到嘔, 好在當時反應快用手接住咋, 唔係就有排抺.   為左久咳未好, 試過買好多野試, 念慈菴, 冬蜜, 重有各式各樣的喉糖等, 依家我總算無咩咳了, 但黃生重係朝早特別多咳, 唔知各位有咩特別配方可以試, 最重要唔難買到.

Rilakkuma 磨甲器

巡舖時見到依個鬆弛熊磨甲器, 粉系顏色咁可愛, 應該會磨得開心D....HEHE ($59/)

Little Twin Stars iphone protective film

行街時無無聊聊咩都睇, 比我見到款老闆話新出的 Little Twin Stars iphone protective film, 本來見到有款係黑紫間條都好sharp而且可以配埋case, 不過自細喜歡的第一款卡通人物就係佢, 最classic都係佢粉紅色的夢幻感覺, 最終都係選擇心目中想要的款式, 真係好靚好喜歡!! $78/ 包貼購自新都會.

Smart Cleaner stick on the phone

星期六同singapore返香港的表弟婦行左成日街, 自己都有些少收穫, 最正買到依款Smart Cleaner, 最初睇平平無奇, 當了解過後真係好有用架, 係一個可不斷循環再用的清潔用品, 而且可貼上電話背面, 如果貼面污糟左重可以用清水洗, 真係好好用呢!! 

另外重有韓款的長方型款式, 我買依款已經係每款last one, 重有少量有趣款式咋.

 

最初擔心不光滑的表面貼不上, 原來都可以呢, 真方便!   @22/pc

Smart Cleaner產品用法及介紹