特色菜 - 大中華

威廉王子大婚, 我就約左姑姐行街食飯, 其實都無關係o既... :P

行左陣太子, 就一齊去長沙灣大中華, 之前同奶奶食過一次, 今次再黎, 水準無變!

 

芥菜鹹蛋肉片湯 - 幾好飲, 有D似飲魚湯, 一樣有奶白色. (分左湯先記得影)

 

冰鎮青瓜 - 特別新鮮爽脆, 配wasabi 豉油, 似食日本菜, 特色只在冰鎮, 菜色其實無咩特別.

 

上次都有食的臘味煲仔飯, 上枱前攪混所有飯菜, 香熱野味, 重有飯焦.

 

圖中出晒煙的黑椒豬手, 枱枱必點, 黑椒汁淋上燒熱的鐵板, 香味同蒸氣四散, 完全吸引所以人目光, 切開大大隻的豬手, 肉好夠淋, 加上黑椒野味, 必食菜色!

 

蔥爆鮑片 - 個個一試, 好好味, 個汁爆得好有穫氣, 鮑片質感亦剛剛好, 唔會un, 感覺比上次食冰鎮飽魚更正!

 

開飯網多人推介的南乳炸鱔, 好厚肉, 配上南乳汁, 即刻令我同姑姐回想以前嫲嫲會在過時過節煮的南乳炸魚的一樣味道.

 

蒜蓉粉絲蒸扇貝 - 炸得香的蒜蓉配上好多粉絲, 扇貝就細隻左d, 但味道實在係好味! @$18/

 

豐富滿足的一餐, 水準依舊, 怪不得當日5點打去book要9點半先有位, 好在都無令人失望!! total HKD790/

第一次的大中華食評 (click here)

陪睡寶寶

hugo有隻一樣色的陪睡寶寶, 攬住瞓特別冧!

決心出走之貓

讚! 一隻決心出走搵dream girl的貓! 貓主角有heart有演技!

 

生記粥麵@上環

25/4星期一 o係上環搵左間出名的生記粥麵店, 其實之前油麻地返學都食開另一間分店, 第一次食已經覺得好唔同平時食的牛腩河, 牛腩好新鮮好有牛味, 加上味道恰好的清湯, 令我耐唔耐都會想去再食.

食開油麻地店, 上環店味道感覺差少少, 蔥花亦太大粒, 但都好好味.

芝娃娃家族已到港

幫blog友問開, 芝娃娃家族已於青衣城展銷位獨家優先發售, 五月中左右會在其他門市有售.  不過唔知青衣城賣晒未, 都係等其他門市有折先去買.

慶祝復活節大豐收

好攰呀, 依家先有時間坐底, 想快快記錄今日所有開心事!

一早過左海拜阿爺, 之後去左灣仔睇earphone, 聽啱左款又可惜無貨, 算喇, 等覆返唔返到貨... 行完就去cwb, 發覺last holiday街上特別少人, 行得特別舒服. 上左sogo睇新裝修, 森林家族專櫃細了, 但部份產品裝在大大個display櫃上, 幾壯觀!

見到無咩想買, 但剛影完兔家族大合照, 發覺 brown rabbit 唔太齊, 就比藉口自己買set family慶祝復活節, 而且做緊85折都係$272/.

 

新年時買左條好靚的日本白瓷手鏈, 早輪去睇頸鏈斷晒貨, 戒指都無, 但重可以等4月返貨, 經開心癢癢睇下有無貨返, 見到喇, 拎左上手, 又點會走得甩, last 3隻, 自知唔買實後悔, 唔再諗咁多, 又用復活節症候群做藉口, 買埋返屋企.  其實真係好靚好鍾意, 貴少少都值喇......keke

 

是日亦有另一個慶祝原因, 就係咁o既經濟環境下, 黃生都有人工加, 咁開心, 實在要慶祝下, 黃生送左件乾濕褸比我, 雖然依家已經熱, 不過個款唔易搵到自己啱心水, 買定留返秋天著都好! 黃生都買左條牛仔褲, 兩件都係zara買, 發覺我地越黎越鍾意去zara購物, 因為款式物料都比較好, 物有所值.

開心的一天完.

Happy Easter 兔家族大招集

Happy Easter Everyone!! 森林兔家族大招集

兔年的復活節, 12年先一次, 就招集各兔家族成員黎張大合照.

本來想搵埋特別版的兔家族, 不過都係唔捨得拆.

數數下, 原來baby買得唔多, 唔同種族就有唔少.

黎個無獎遊戲:

1)圖中有幾多種類的兔家族

2)奇怪, 原來有一個唔係兔家族的成員, 邊個混水摸魚呢.

食得滿足, 身型更滿

22/4放假第一天, 約左黃生舊同事又去偉記bbq, 食足5個鐘再轉去b仔食甜品, 肚子滿足到爆, 身型亦相對肥爆, 唔得喇, 冬天不斷食的習慣, 真係要開始食少d, 希望keep返上年去泰國前的身型!!

北口韓食店, ROLL

20/4星期三, 放工去左剪頭髮, 今次剪個清爽d迎接春夏氣溫, 不過黃生話無咩點變...= =

剪完後約左阿妹食飯, 帶我去韓國街食, 幾間都要等, 最後揀左間好細的北口, 樓面得4張枱仔, 食物細份抵食, 兩個人都可以試多d.  老闆係韓國人, 店員有禮, 亦有韓國人幫襯.

甜辣炸雞, 唔錯, 個汁少少甜辣, 好啱食, 不過可以再辣d, 炸粉薄d更好.

 

自選三式炸物: 魷魚鬚, 紫菜卷, 餃子

食物ok喇, 食店亦細心剪開得一件的食物比2人共享.

 

煎韓式腸粉, 比想像的好食, 內脆外有甜辣醬汁.

 

韓式辣冷麵, 個人覺得ok的, 係用較辣的汁撈成.

 

芝士麵, 即係辛辣麵加塊cheese, 又幾好食架, 自己整都得wor.   total埋單$98/

 

食飽飽比阿妹捉左去roll食yogurt, 加上藍梅同米通之類, 本來我唔食yogurt架, 食第一啖都怪怪地, 但食下食下又ok wor. 抵佢依期大熱. $35/

是晚妹請, 食得更爽.:p

M&S CHOCOLATEY SPONGE ROLL

o係馬莎買左依隻朱古力海綿卷, 好正, 我食得甜都覺得漏.

 

一條裝, 食幾多自己切.

 

好濃朱古力, yummy!!

自制芒果布甸

想食芒果布甸, 買晒材料等黃生整, 咁多有排食!

D呂宋芒都幾甜, 但我太怕酸味, 依幾個芒果只係有些少酸, 我都好敏感.

 

double mango, 落重料.

 

整得都幾好味.

青衣城的森林家族動物村

青衣城攪森林家族繽紛庭園動物村, 會搵日去睇下有咩特別先.

 

 

signs

唔記得以前睇過依個短片, 原來就係"單身男女"被指抄襲的短片, 不過我覺得題材要係相似都係依一部份, 最重要係"單"片成個故事結構做得好.

 

單身男女(窩心愛情片)

好耐無特別推介電影, 重要係愛情戲, 早幾星期前, 經地鐵見到"單身男女"海報已經比兩位俊男主角吸引, 再聽唔少人好評, 終於咁遲都走去睇.

15/4星期五同黃生食完飯行陣街就睇10:10pm, 好耐無睇咁夜, 都係唔想返屋企麻煩, 好在12點幾重有輕鐵搭.

讚賞杜琪峰好有時代觸角, 明白近年收得的愛情片都有3大元素,

1)都係2個靚仔男主角一齊喜歡唔須要靚但有個性的女主角

2)有錢到唔真實的男主角, 令睇的人都會幻想有一個, 當然睇o既都係女士先有共鳴吧.

3)當然都要有一個令觀眾睇得開心窩心的劇情故事

除左以上元素, 欣賞依套戲篇寫得好好, 唔少攪笑位, 亦有合適的歌曲, 一首"愛很簡單"完全講出男女主角的愛, 增加共鳴感....

唔講太多, 內容都係自己睇好, 我會揀依套戲係我5大喜愛愛情片之一.

板長@屯門

15/4星期五去左屯門睇戲食飯, 第一次試板長, 以前黎親都排長龍, 見到都嚇走, 今次拎左飛就行陣街先, 行行下至決定買飛睇戲...

轉個頭返黎, 話咁快就到我地, 睇鐘應該都係等左約20分鐘

蟹子芒果沙律, ok, 特別在得個4-5舊芒果肉, 沙律超細份. 可能我食開元朗的金田細size都比依份大兩陪,30幾蚊咁o既分量真係收得貴.

 

特價$8蚊的唔記得咩魚壽司, 黃生話ok喇.

 

燒秋刀魚susi, 少許腥, 但都幾好味.

 

生蠔同uni susi, 前者黃生話ok, 基本上問佢都係答ok

後者鮮, 但無海膽的甜, 咁出名的susi店都不及我以前食過的普通日式餐廳.

 

黎到先知自己double order 蝦天婦羅同蝦天婦羅susi, 味道質素不過不失.

 

好好肉, 比想像中大件的鰻魚susi, yummy!

 

燒三文魚鮫, 又係細細份, $35-40價錢等於出面食的兩陪份量, 不過佢係我食咁多間之中最好食的一間, 肉質鮮嫩味美!

埋單約$210/, 食物份量細, 價錢較貴, 但係其中有些食物有佢值得食之處.

森林家族廚房3間新店, 另舊店結業

剛收到blog友通知, 位於日本吉祥寺的森林家族廚房已結業, 本來唔想相信的我, 亦已經請香港代理向日本epoch証實已經結業, 聽到這個消息實在令我好失望, 因過往都可以在潮聖的路上, 享受行經井之頭公園時的環境, 雖然餐廳已無了, 但有機會都會再去這公園, 尤其賞櫻!!

無了最近新宿的森林家族廚房, 余下的只有官網上的兩間

http://sylvanian-families.jp/store/kitchen/ 

1) 千葉縣流山市西初石6-18  5-2流山蒼鷹的森林S•C   3層 (New shop) (google map)

2) 千葉県船橋市浜町２丁目１−１TOKYO-BAY Lalaport 北館2階 (下圖) (google map)

-到達lalaport森林家族廚房方法 (click here)

-附上上年4月去時的遊記(click here)

 

除官網的2間店之外, 今年4月尾會有多1間新店在埼玉県 AEON 內. 詳細資料有代日本官網公佈.

黃天霸滿開

d花越開越靚, 越開越香!!

 

12/4 滿開的百合剪開了會脫色的花蕊

 

13/4 右上角還有花蕊的百合, 更美!

顯哥威

hugo平時都好乖, 與細佬相處都ok, 但有時都好鍾意顯哥威, 依d都係一般貓世界中的普遍情況.

依刻hugo又擺阿哥款, 細佬即刻扒地飛機耳.

粉飾小飾櫃

小飾櫃已經買左成年有多, 一直都想幫佢貼wallpaper, 咁簡單的手作終於完成.

 

原本的樣子.

 

貼上wallpaper後

 

放上森林家族的小配件, 好可愛!!

黃天霸盛開

放工返到屋企, 一陣香味撲鼻, 黃百合盛開了.

高企望街

sunday好天氣, 唔出街都要望街.

 

擔天

望地

 

重要企得高高在上, 雖然面積細小, 最重要hugo睇得開心.