星期六公司洗冷氣槽所以要返公司睇睇, 放左工就join黃生出cwb行, 好耐都無出去行下喇, 見sogo有pre-sale, 係時候去巡下舖喇, 可惜無收穫.
當日天氣真係好差, 落雨落到無停, 好在著定涼鞋, 一出到去搵左間好多人食的"文輝墨魚丸大王" order左個紫菜墨三鮮河, 有墨魚丸, 墨魚仔, 魷魚, 講真真係無咩特別, 個湯又無味, d餸就ok咁喇, 不過叫得墨魚丸大王重諗得會特別好食, 點知同我食開o個d都不及, 但就係出名攪到舖裡舖外都迫滿人, d位先算到盡, 一張細細的長枱仔都坐6-8人, 重要腳頂腳, 如果係好食我都唔介意迫下o既, 不過真係無咩料到, 反而覺得個腐乳通菜都幾好, 好多腐乳汁幾好味.
晚餐5點幾去定清亭燕萍食越南菜, 因為晏少少就會好多人, 所以次次都早d去, 不過我諗o個日天氣差, 真係無咩客, 重比我2個去4人枱坐tim, 平時真係唔洗指意.
其實我差不多次次去cwb都係食佢, 真係好鍾意食佢d牛油蒜蓉雞翼, 今次重order6隻, 4隻都真係唔夠喉呀! 不過個味就淡d, 可以加附上的鹽同lemon汁.
炸蝦餅有水準喇.
第一次試雜錦炒粉絲, 有大大粒蝦加扎肉, 都炒得幾好味.
近排愛上大快活的吉列魚柳餐, 炸得真係幾好食, 試過食mushroom sauce, 但都係curry最正, 不過汁太少喇, 下次要叫佢比多d先得.
黃生食依個餐都唔錯, 個排骨醃得好入味.
沒有留言:
張貼留言