懷舊菜 - 得龍大酒樓

上星期同奶奶慶祝母親節, 去左新蒲崗-得龍大酒樓食懷舊菜, 咁大個女都真係未試過bor.

先黎個海皇冬瓜盅, 要提早預訂先有得食架, 清熱唔錯, 味道厭多了點胡椒, 整體都ok o既.

 

花彫話梅豬手 - 我至怕有酒味的食物, 不過依個食食下又ok wor.

 

金錢雞 - 咁大個女, 聽依味餸就聽得多, 食真係第一次, 未咬入口, 我已經見到有一大塊肥膏o係底, 依個都唔係問題, 我都照食, 但係點解d肉咁淋散o既... 事後同同事講返先知金錢雞並唔係雞肉黎, 而係唔知咩雞內臟撈埋一齊. 真係試一次就夠lor, 不過奶奶又食得好enjoy wor, 唔同o既, 依d真係上年紀o既人先識欣賞. (要提早預訂)

 

全枱人覺得至好食的 "砵酒焗桶蠔", 不過我唔食蠔, 所以無試到.

 

我覺得至好食的炸鮮奶拼大鱔, 鮮奶炸得外脆內似淋左o既布甸, 滑滑地, 香口野都係啱我d.

 

古法太爺雞 - 依個犀利喇, 一黎就聞到點解有陣燶燶地o既味o既?? 食入口重大陣味, 我問係咪d味係咁架? 原來真係特登煙燻到有燶味架, 初頭有d怪, 不過食落又好頂引bor. (要提早預訂)

 

麻麻地的梅菜扣肉, d肉un lor.

 

依味就係蝦子抽皮喇, 電視就見得多, 今次有幸品賞, 口感有d似煲淋左的冬瓜, 講真我就真係唔係好識欣賞, 不過最重要都係奶奶真係幾鍾意依味餸.

 

臨尾order多個啫啫蝦乾炒生菜, 佢係上枱先落煲一齊撈o既, 蝦乾炒真係香到不得了, 一流架.

 

今晚免費贈送的糖水甜品, 我都幾喜歡食的桂花糕, 係水左d, 唔夠啫喱口感.(個人喜好吧)

 

我食得甜都覺得勁甜的紅豆砂, 正呀!

 

講真是晚食o既係懷舊菜, 碟碟細之餘亦唔平(7人埋單大約千二), 雖然自己真係對依餐興趣唔大, 不過最重要都係奶奶食得開心喇.