舊式酒樓-蓮香樓

好多香港人同外國人都好欣賞的蓮香樓, 剛在星期六終於去了一試.

最有味道都係依道的舊式酒樓感覺, 用獨立茶碗泡茶.

 

除此之外, 就真係無咩值得我欣賞喇...

本來黎到都心知不妙, 人多到幾枱就有一堆人等, 我行左一半就比我見到有人走, 即時有位坐, 都唔知好彩定唔好彩, 一張枱都要同3,4組人搭枱, 感覺真麻麻, 說實話, 我要係去飲茶另原等位都唔喜歡同人搭枱, 難得飲茶點都想坐得舒舒服服.

見侍應叔叔抹枱的毛巾, 真係污糟得恐怖, 碗碟更洗得好唔乾淨, 就算我去大排檔食都未見過咁過分.

 

到食物, 黎得都係想食下蝦餃, 燒賣咁姐, 但等左好耐都唔見, 搵到d唔洗等的;

-蒸魚頭: ok

-蒸牛肉腸粉: 皮唔多滑 

-蒸甜酸排骨: 一見個樣已經覺唔妥, 外有一層蒸到粉開晒的麵粉, 個味重超怪, 食左半啖已經食唔落. 

 

等左陣, 遠處見到有架點心車仔推出, 已經勁多人擁上去, 咁o既情況我真係未見過, 食d咁普通的點心都要掙先食到?!

好在黃生都拎到兩籠點心, 佢返黎話, 個推點心車的阿姐好巴閉架, 咁多人擁埋去, 佢話要食咩只可以講一次, 第2次就比佢話, 重有唔可以自己拎, 唔係就鬧架.

講返食物;

-燒賣: 一般喇

-蝦餃: 蝦大筍靚, 不過個皮厚過塊mask

總結, 眼見好多內地遊客同老外黎食, 食佢舊式酒樓感覺係值得o既, 不過其他真係無一樣吸引我, 一次就夠.