尋找兒時魚蛋粉回憶

剛過的星期六, 終於的起心返大埔尋找兒時魚蛋粉回憶, 自從出黎工作, 已經10多年無食了...

首先到"欽記", 當年還記得在大埔墟舊街市時, 這間在街市內的大排檔好巴閉架, 自己等位坐, 無隊排, 坐底唔好叫人落單, 等人埋黎先叫, 每人只可order一次, 唔夠食都無得再落單, 係咪巴閉到極呢, 不過當日去已經無依個境像喇...
就算聽唔少人講佢大不如前的食評, 但點都要返黎試.  最記得當年份量好細碗架, 細細個的我都要食兩碗呢, 依家份量正常喇, 依度的魚蛋麵包括魚片魚皮的, 魚蛋依然彈牙, 有人話無以前咁彈, 我覺得ok喇, 個麵依然保持淋身, 係呀, 佢一向都係淋的, 唔會好似出面的雲吞麵咁爽口, 主角係魚皮, 依個較失望了, 已經無當年美味非常的厚身魚皮喇, 變成周圍可見的普通貨了...  雖然等了咁多年已經無以前的水準, 不過一路食一路點辣椒醬, 實在回味無窮!!!   @$22/
p.s. 2點幾到, 落單無耐就無魚蛋了.

食過唔夠喉, 去埋"新蔡潤記", 細個只係食過依間咋, 無食舊o個間, 本來都有去舊店"蔡潤記"睇睇先, 去到已經無魚皮了, 黃生重聽到有條友好串咁講, 無晒喇(語高氣傲), 意思一早就無喇, 睇開飯網都見人話間舖d人串到唔再幫襯架喇....
anyway, 返去"新蔡潤記",  2點幾重有炸魚皮, 細個又食開的, 當然入去回味下先...
我依然食魚蛋魚皮麵, 魚蛋無咁彈牙, 麵身就比較爽, 主角魚皮係占上厚粉炸成, 黃生唔太喜歡, 雖然佢d魚皮比較硬, 不過始終有別於出面見慣的魚皮, 加上我喜歡的炸粉所以好啱我食, 我重外賣了一份魚皮呢!   而黃生的牛腩河ok, 不過牛腩似乎切錯紋, 唔易咬開. 每碗$20/, 炸魚皮$18/

實在好開心滿足的兩餐!!