7/3同奶奶一行6人去紅磡"金葉子"食自助餐, 任食兩小時都係$150位, 最重要依間食泰菜的地方, 食物水準真係掂, 款式又多, 8點前埋單重有85折, 絕對值得推介呀!
一個每2人附送的木瓜salan, 我平時唔食的, 但真係唔臭木瓜味, 重好鮮甜!
依條明爐烏頭魚, 平時出面食都要百幾蚊喇, 完全值回票價.
小食併盤, 樣樣都熱辣辣, 好好味, 特別喜歡個蝦餅, 炸得香脆彈牙!
依個蒜蓉青口, 好食到叫左2次.
豬頸肉就一般喇.
海鮮粉絲沙律, 無得頂, 同我平時出面食開的一樣咁好食!
依個蜜糖雞翼同併盤的雞翼唔同, 甜甜地又熱又皮脆, 正呀!
東陰公, 以前第2度飲過覺得唔啱自己口味, 不過依個酸酸地小小辣, 好易入口, 幾好味!
海南雞我就麻麻喇.
雞,牛,豬串燒都唔錯.
波蘿炒飯, 有水準, 內裡重有鮮蝦等材料.
佢重有多種飲品任飲...
我飲過椰汁冰同龍眼冰, 一樣咁正, 後者重甜甜地, 可中和食過的熱氣食物, 不過d冰多左d, 可叫少冰.
無骨鳳爪, 一樣有水準.
魷魚沙律就一般, 無咩特別.
試多個牛肉湯, 味道都好似東陰公, 特別在牛腩好林好好味道!
黎碟清炒芥蘭, 幫助消化.
大蝦粉絲煲, 雖然無o係泰國食過的咁多蒜蔥香味, 但都ok.
最後送的甜品, 最好食都係椰子西米糕.
今次依間真係好食又抵食, 只係試左佢3分1的食物, 下次都會再黎!
P.S. 當日的侍應服務好好, 得閒都會走黎問有無野漏單, 清理食完的碟又快, 重有人特別remind我地8點前埋單會有85折, 我地食左個半鐘已經飽飽, 所以都提早走, 今時今日咁o既服務真係值得一讚!
沒有留言:
張貼留言