十大公共交通工具內的怪現象

十大公共交通工具內的怪現象, 看到依段新聞真係好有共鳴, 有時真係好想出聲鬧依d人, 不過好多香港人好無公德, 自己唔啱又喜歡聲大夾惡, 唔明d人係咪無媽媽教架呢, 點解咁多人都做d令人反感的行為, post依段新聞, 係想多d人有返d公德心, 唔好再咁自私喇唔該!!

 

 

港人搭車醜態 (作者: Ching:) 
剪指甲、化妝、大聲講電話……香港公共交通工具係一個好自由嘅空間，做乜都得 o架。國際傳媒就覺得呢啲港式文明好有趣， CNNGO臚列咗「十大公共交通工具內的怪現象」，大家不妨反思一下，當中有冇一兩樣怪行，自己都做過呢？

讓指甲飛
非正式統計，喺公共交通上剪指甲係最令人討厭嘅行為。重點係唔知道對方剪落來嘅指甲，會飛去邊個方向。指甲藏滿細菌，喺公眾地方剪指甲會散播細菌 o架。

 

 

巴士、火車、地鐵，各式各樣嘅聲音提示，已令到人非常煩厭，偏偏仲有人鍾意打開 speaker播音樂、打機，為人多擠逼嘅車廂再添噪音。

 

柱男柱女

搭地鐵不時都會見到小朋友利用扶手柱作出好多高難度旋轉，滋擾他人。不過啲大人仲衰格，成日都唔理你係唔係已緊握扶手，一嘢成個人挨過嚟，甚至壓住你隻手。

 

大聲講電話

「你有壓力，我有壓力，你做乜挑釁我呀？」巴士阿叔一夜成名，好多人仲識得背晒阿叔演講全文，其實件事嘅起因，係一個後生仔勸佢講電話細聲少少。

 

車廂困獸鬥

無論港鐵點樣宣傳都冇用，好多上車嘅人唔等乘客落晒車就逼入去，搞到入面嘅人落唔到車。上到車嘅人為咗方便落車，又唔肯企入啲，搞到出面嘅人入唔到。

 

表演化妝

港女鍾意喺公共交通表演化妝絕學，唔係搽下唇膏咁簡單，而係喺搖擺不定、人來人往嘅車廂內畫眉、夾眼睫毛、搽睫毛液、擠暗瘡等等，不知幾咁大方得體。

 

當眾大小便

好多乘客家長對廁所嘅概念，仲係停留喺原始人逐水草而居嘅階段，於是乎小朋友喊住話急屎急尿，就抱佢屙落垃圾桶或者月台下面，好啲嘅就用個膠袋。

 

一人霸兩位

早輪揚名網絡嘅賜座男，其實只係冰山一角。好多人都鍾意將隨身物品放喺旁邊座位，就算全車滿座，都唔肯拎起，呢種劣行喺巴士比較常見。

 

飛腳過河

大部份巴士嘅下層後座，座位設計都係面對面，乘客貪舒服，好多時都將對腳放上對面座位，就算對鞋幾污糟都話之你，後一個乘客就領晒嘢。

 

人肉按摩椅

喺巴士或小巴上，突然感到椅背有一對滑輪移上移落。原來係後座嘅乘客將對膝頭頂住椅背，呢個姿勢睇來幾舒服，但係長遠對脊椎一定唔好，而前座乘客亦都受苦。




CNNGO網站近日列出港人10大乘車醜態之後，中國網民近日在微博上亦進行同類投票，選出廣州民眾10大乘車陋習。
在眾多民眾投票下，在車廂隨地吐痰、排隊打尖及在車上摳腳趾，分別成為首3大陋習。
在今次選舉中，主辦者先選出 17項在公共交通工具上，乘客常見的陋習給網民投票。至前晚 7時，主辦者共收集到逾 2,000名網民的投票結果。當中以車廂內亂吐痰以 1,670票高居榜首，最令人討厭。
在巴士站、地鐵站排隊打尖、在車廂內摳腳趾的行為則分列第二及第3位。另在車廂內高聲講電話、挨住扶手當‘柱男柱女’及一人霸多個位等項目，竟與香港人10大乘車陋習相同。至於在車廂內隨處大小便、在車上鹹豬手及赤膊坐車等項目，則最具‘當地特色’的陋習。

港穗乘車陋習比較
香港
排名 1：剪指甲
排名 2：聽歌音樂太大
排名 3：做‘柱男柱女’
排名 4：大聲講電話
排名 5：車廂內化妝
排名 6：強行擠進車廂
排名 7：小童在車廂內大便
排名 8：一人霸多個位
排名 9：發出濃烈氣味
排名 10：以膝頭頂前面座位
廣州
排名 1：隨地吐痰
排名 2：打尖
排名 3：摳腳趾
排名 4：大聲講電話
排名 5：隨意大小便
排名 6：鹹豬手
排名 7：做‘柱男柱女’
排名 8：行李塞門口
排名 9：一人霸多個位
排名 10：赤膊乘車

重有早排熱爆的面膜女, 你係咪真係咁掙分奪秒呀!!

 

以上咁多行為, 我最憎都係"剪指甲", 唔明咁私人的行為都要o係公眾場所做, 重要坐你附近, 真係好鬼唔衛生, 又怕比佢d指甲插盲隻眼!

最常見就係"大聲講電話"同"化妝", 依d日本人就好自律, 完全唔會o係車廂內進行, 其實有時d女仕想用靚樣見人, 點解唔早少少起身, 要比人見到你變臉前後的魔術表演, 有時真係有d衝動想幫佢拍底比佢睇下, 你咁樣真係好肉酸架!!

有時遇到"柱男柱女", 我會用五抓金龍去對付依d人, 有次佢重反怒o卑我, 我都懶得理佢. 雖然我都唔想攪得咁唔和諧, 但真係頂唔順先出此下策.