新加坡機場 - 驚喜蝴蝶園 day 7 - 28/09/2011

o係新加坡咁多日都無食過喇沙, last day auntie帶我地去大排檔食左碗, 湯底調味複雜, 只食得出微辣同椰醬, 實在好好味! 真係好想o係香港都可以食到, 不過有都一定唔平吧.



香港都有的撈麵, 但新加坡的好食在個醬汁, 撈起來更加入味, 排骨亦炆得夠淋, 平凡的食物變得不平凡.

早4個鐘去到機場, 為的是想睇電視旅遊節目介紹過的新加坡機場娛樂景點, 依個機場有3個Terminal, 搭sky train都十分快捷方便, 班次亦好密, 搭去另一邊Terminal都唔洗3分鐘.

先到Sunflower Garden

種滿了美麗的太陽花, 不過說實話, 唔夠時間可以不來, 因更好玩的在後頭.

小小的蘭花園

Game area有唔少娛樂設施

有小型私人影院, 另有個大螢幕的, 還有好多供上網的電腦在唔同地方給遊客享用

黃生玩緊X BOX - KINECT, 第一次玩得幾開心, 重有刻心動想買, 不過買左Wii 都少玩, 都係算吧.

終於到最有趣好玩的Butterfly Garden

一入內已經見到好多蝴蝶周圍飛, 重完全唔怕人, 飛埋我身上

無諗過重有好幾隻飛埋我手上, 真係好興奮, 玩得好開心!!

就算你行到好近, 什至接觸佢地都唔會飛走

原來佢地好努力咁吸食緊菠蘿, 唔怪得攪佢都唔走喇.

o係香港我去過兩個專睇蝴蝶的公園, 但可以行到好近伸到好埋去影蝴蝶真係第一次, 好開心黎到依個咁好的地方, 真係帶比我好多喜悅同驚喜呀!!

 

 

影到好多色彩鮮艷, 斑紋特別的蝴蝶

依隻不停拍動翅膀的蝴蝶在吸食花蜜




o係度玩到唔捨得走, 有機會我一定會再黎!!

好喇, 玩左咁耐係時候準備上機喇, 夠鐘上機前, 突然比黃生見到有間Dunkin Donuts, 我一見到都開心到叫左出黎, 因為o係香港已經無得食喇, 所以我同黃生一到外地都會特別喜歡搵黎食, 就算見到final call, 我地都忍唔住買返半打上機慢慢嘆, 好滿足呀!!



再甜d就更加正喇, 不過有得食都好滿足了.

之前o係新加坡orchard road一商場食左兩件美味的蛋糕, 好彩o係機場亦見到此店, 重買左多款的馬拉糕點
下: 有點椰絲但唔夠甜
左: 綠色無咩味, 但白色有甜甜的椰味
右: 啡色有點椰糖味

 

左: 係jelly口感的椰汁糕, 幾好味.
中; 拎到返香港雪過個皮已經硬了
右: 都係綠無味的jelly口感, 啡就甜甜地

重買左好出名的斑蘭蛋糕, 真係特別香同鬆軟, 做茶點就最啱.




之前食過的蛋糕, 當然好食先再買喇.

今次重試下食斑蘭蛋糕, 係有點斑蘭味, 綠色的唔係cream黎, 係jelly口感, 真係第一次食到咁的蛋糕.

 

今個trip無買d咩喇, 新加坡購物比香港貴, 款式亦無香港多同靚, 所以都只係買左少少紀念品, 香港又開始轉季, 都係留返返香港先買喇.
-特別買左個香港無的森林家族carry case, 黃色的單車好特別呢.
-DAISO 2蚊店買左d Halloween 佈置飾物.
-自己o係 Tioman海邊執左d迷你貝殼同死了的carol做紀念.
-次次都會買的紀念磁貼.
-有少少手飾收穫.

星馬之旅完.